ହରିଆଣାର ଫରିଦାବାଦରେ ଜଣେ ମହିଳାକୁ ଗାଡ଼ିରୁ ଫିଙ୍ଗି ଦିଆଯାଉଥିବାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି। ଏହି ଭିଡିଓରେ ହରିଆଣାର ଫରିଦାବାଦରେ ଜଣେ ଝିଅକୁ ଗଣବଳାତ୍କାର କରାଯାଇଥିବା ଏବଂ ପରେ ଗାଡ଼ିରୁ ଫିଙ୍ଗି ଦିଆଯାଇଥିବାର ଦାବି କରା ଯାଉଛି। ୧୭ ସେକେଣ୍ଡର ଏହି ଭିଡିଓରେ ଝିଅଟି ଗାଡ଼ିରୁ ରାସ୍ତା କଡ଼ରେ ପଡ଼ି ଯାଉଥିବାର ଦେଖାଯାଉଛି। ଅନେକ ଥର ଓଲଟିବା ପରେ, ସେ ତଳେ ଯନ୍ତ୍ରଣାରେ ଛଟପଟ ହେଉଥିବା ଦେଖିବାକୁ ମିଳିଛି।
କିନ୍ତୁ ଫ୍ୟାକ୍ଟ କ୍ରିଷେଣ୍ଡୋ ଭାଇରାଲ ଦାବିକୁ ମିଥ୍ୟା ବୋଲି ଜାଣିବାକୁ ପାଇଲା। ଏହି ଭାଇରାଲ ଭିଡିଓଟି ଫରିଦାବାଦର ନୁହେଁ। ଏହା ବ୍ରାଜିଲର ଉତ୍ତର ମାକାପାରେ ଘଟିଥିବା ଏକ ଘଟଣା ଦର୍ଶାଯାଇଛି।
କ’ଣ ଦାବି କରା ଯାଇଛି ପୋଷ୍ଟରେ?
ଭିଡିଓ ସେୟାର କରି ଜଣେ ୟୁଜର ଲେଖିଛନ୍ତି, “ମୋଦିଜୀ ଙ୍କ ଶାସନରେ ଦେଶରେ ମହିଳା ଙ୍କୁ ସୁରକ୍ଷା ନାହିଁ କାହିଁକି ? ମହିଳାଙ୍କୁ କାର ଭିତରେ ବଲାତ୍କାର କରି ଚଳନ୍ତା କାର ଭିତରୁ ଏପରି ଫୋପାଡ଼ି ଦେଈ ଗଲେ ମାନବ ରୂପରେ ରାକ୍ଷସ ଦାନବ… ସୋସିଆଲ ମିଡ଼ିଆରେ ଏ ଦୁଃଖତ ଭିଡ଼ିଓ ଭାଇରାଲ ହେବାରେ ଲାଗିଛି ସୂଚନା ମୁତାବକ ଏ ଘଟଣା ଫରିଦାବାଦ ର”
ଆମ ଅନୁସନ୍ଧାନ:
ଆମ ଅନୁସନ୍ଧାନରେ ପ୍ରଥମେ ଆମେ ଭାଇରାଲ ଭିଡିଓକୁ ବିଭିନ୍ନ ଫ୍ରେମରେ ବିଭାଜିତ କରି ପ୍ରତ୍ୟେକ ଫ୍ରେମର ଗୁଗୁଲ ରିଭର୍ସ ଇମେଜ୍ ସର୍ଚ୍ଚ କରିଲୁ। ଫଳସ୍ଵରୂପ ଆମକୁ ସମାନ ଭିଡିଓ ୩୦ ମାର୍ଚ୍ଚ ୨୦୨୬ ରେ ଏକ ବ୍ରାଜିଲିୟ ଗଣମାଧ୍ୟମର ଇନଷ୍ଟାଗ୍ରାମ ଆକାଉଣ୍ଟରେ ଅପଲୋଡ୍ ହୋଇଥିବା ମିଳିଲା।
ସୂଚନା ଅନୁଯାୟୀ, ୨୮ ମାର୍ଚ୍ଚରେ ମାକାପାର ଉତ୍ତର ଭାଗରେ ଜଣେ ମହିଳା ତାଙ୍କ ସାଥୀଙ୍କ ସହ ଯୁକ୍ତିତର୍କ ସମୟରେ ଚଳନ୍ତା କାରରୁ ଡେଇଁ ଆହତ ହୋଇଥିଲେ। କ୍ୟାମେରା ଫୁଟେଜ୍ ସେହି ମୁହୂର୍ତ୍ତକୁ ଦର୍ଶାଉଛି ଯେତେବେଳେ, ରୁଆ ମାଟୋ ଗ୍ରୋସୋ ସ୍ଥାନରେ ମୋଡ଼ ନେବା ସମୟରେ, ମହିଳା ଜଣକ କାରର ଦ୍ୱାର ଖୋଲି ନିଜକୁ ବାହାରକୁ ଫିଙ୍ଗି ଦେଇଥିଲେ।
ଅଧିକ ସର୍ଚ୍ଚ କରିବା ପରେ ବ୍ରାଜିଲୀୟ ଗଣମାଧ୍ୟମ ଦ୍ୱାରା ମାର୍ଚ୍ଚ ଏବଂ ଏପ୍ରିଲ ୨୦୨୬ ରେ ପ୍ରକାଶିତ ସମାନ ଦୃଶ୍ୟ ସମ୍ବଳିତ ଅନେକ ରିପୋର୍ଟ ମିଳିଲା। ରିପୋର୍ଟ ଅନୁସାରେ, ଘଟଣାଟି ୨୮ ମାର୍ଚ୍ଚ ୨୦୨୬ ରେ ବ୍ରାଜିଲର ମାକାପାର ପାକୋଭାଲ ଜିଲ୍ଲାରେ ଘଟିଥିଲା। ମହିଳା ଜଣକ ତାଙ୍କ ସ୍ୱାମୀ, ଭାଇ ଏବଂ ଭଉଣୀଙ୍କ ସହିତ ଏକ କାରରେ ଥିଲେ ଯେତେବେଳେ ଏକ ଯୁକ୍ତିତର୍କ ହୋଇଥିଲା। ଝଗଡ଼ା ସମୟରେ, ସେ ଚଳନ୍ତା ଗାଡ଼ିରୁ ଡେଇଁ ପଡ଼ିଥିଲେ।
ଆମେ ଏହି ଘଟଣା ବିଷୟରେ ସୂଚନା ପାଇଲୁ ଯାହା 30 ମାର୍ଚ୍ଚ, 2026 ରେ ଏକ ବ୍ରାଜିଲୀୟ ୱେବସାଇଟରେ ପ୍ରକାଶିତ ହୋଇଥିଲା। ଜଣେ ସ୍ଥାନୀୟ ପୋଲିସ ଅଧିକାରୀଙ୍କ ଅନୁସାରେ, “ଘଟଣାଟି ବ୍ରାଜିଲର ମାକାପା ସହରରେ ଘଟିଥିଲା, ଯେଉଁଠାରେ ଜଣେ ମହିଳା ଯୁକ୍ତିତର୍କ ଏବଂ ଉତ୍ତେଜନା ପରେ ଚଳନ୍ତା ଗାଡିରୁ ଡେଇଁ ପଡ଼ିଥିଲେ। ତା’ପରେ ତାଙ୍କୁ ଚିକିତ୍ସା ପାଇଁ ଡାକ୍ତରଖାନାକୁ ନିଆଯାଇଥିଲା। ଏହି ମାମଲାରେ ପୋଲିସ ଗାଡିର ଡ୍ରାଇଭର ଏବଂ ତାଙ୍କ ପୁରୁଷ ସାଥୀଙ୍କୁ ହେପାଜତକୁ ନେଇଛି।”
ସିଦ୍ଧାନ୍ତ:
ଆମ ଅନୁସନ୍ଧାନରେ ଭାଇରାଲ ଦାବି ମିଥ୍ୟା ପ୍ରମାଣିତ ହେଇଛି। ବ୍ରାଜିଲର ଏକ ଘଟଣାକୁ ଫରିଦାବାଦରେ ଜଣେ ମହିଳାଙ୍କୁ ବଳାତ୍କାର କରି ଫୁଟପାଥରେ ଫିଙ୍ଗି ଦିଆଯାଉଥିବା ମିଥ୍ୟା ଦାବି ସହିତ ଭିଡିଓ ସେୟାର କରାଯାଇଛି।
Title: ବ୍ରାଜିଲର ଏକ ଘଟଣାକୁ ଫରିଦାବାଦରେ ଜଣେ ମହିଳାଙ୍କୁ ବଳାତ୍କାର କରି ଫୁଟପାଥରେ ଫିଙ୍ଗି ଦିଆଯାଉଥିବା ମିଥ୍ୟା ଦାବି ସହିତ ଭିଡିଓ ସେୟାର କରାଯାଇଛି।
Fact Check By: Siddharth Sahu
Result: False
