ପଶ୍ଚିମବଙ୍ଗ ବିଧାନସଭା ନିର୍ବାଚନର ପ୍ରଥମ ପର୍ଯ୍ୟାୟରେ ରେକର୍ଡ ଭାଙ୍ଗି ଭୋଟରଙ୍କ ମତଦାନ ପରେ, ରାଜନୈତିକ ଦଳଗୁଡ଼ିକ ଭୋଟ ପ୍ରତିଶତ ସମ୍ପର୍କରେ ପରସ୍ପର ବିରୋଧୀ ଦାବି କରୁଛନ୍ତି। ଏହି ସମୟରେ, ସୋସିଆଲ ମିଡିଆରେ ଏକ ଭିଡିଓ ପ୍ରସାରିତ ହେଉଛି ଯେଉଁଥିରେ ଏକ ଗୋଷ୍ଠୀ ଏକ ପୋଲିଂ ବୁଥରେ ହଙ୍ଗାମା କରୁଥିବା, ଭଙ୍ଗାରୁଜା କରୁଥିବା ଏବଂ ନକଲି ଭୋଟ ଦେବାକୁ ଚେଷ୍ଟା କରୁଥିବା ଦେଖାଯାଉଛି। ଦାବି କରାଯାଉଛି ଯେ ଏହି ଭିଡିଓଟି ପଶ୍ଚିମବଙ୍ଗରେ ନିର୍ବାଚନର।
ଭିଡିଓ ସେୟାର କରି ଜଣେ ୟୁଜର ଲେଖିଛନ୍ତି, “ଦଶନ୍ଧି ଦଶନ୍ଧି ଧରି ପଶ୍ଚିମବଙ୍ଗ ନିର୍ବାଚନର ଇତିହାସ କେବଳ ଜନମତରେ ନୁହେଁ, ବରଂ ହିଂସା ଏବଂ ରକ୍ତପାତରେ ମଧ୍ୟ ଲେଖାଯାଇଛି। କଂଗ୍ରେସ ଶାସନର ଶେଷ ସମୟ ହେଉ, ବାମପନ୍ଥୀଙ୍କ ୩୪ ବର୍ଷର ସାମ୍ରାଜ୍ୟ ହେଉ କିମ୍ବା ବର୍ତ୍ତମାନର ତୃଣମୂଳ ଶାସନ—ସମୟ ବଦଳିଛି, ଶାସକ ବଦଳିଛନ୍ତି, କିନ୍ତୁ ବଦଳିନି ‘ନିର୍ବାଚନୀ ହିଂସା’ର ସେହି କଳଙ୍କିତ ପରମ୍ପରା। ଇତିହାସର ପୃଷ୍ଠାରୁ କିଛି ଦୁଃଖଦ ସତ୍ୟ: ୬୦-୭୦ ଦଶକ: ନକ୍ସଲ ଆନ୍ଦୋଳନ ସମୟରୁ ଆରମ୍ଭ ହୋଇଥିଲା ରାଜନୈତିକ ହତ୍ୟାକାଣ୍ଡ। ବାମପନ୍ଥୀ ଶାସନ: ନନ୍ଦୀଗ୍ରାମରୁ ସିଙ୍ଗୁର ପର୍ଯ୍ୟନ୍ତ, କ୍ଷମତା ପାଇଁ ଅନେକ ସାଧାରଣ ଲୋକ ବଳି ପଡ଼ିଛନ୍ତି। ସାମ୍ପ୍ରତିକ ସ୍ଥିତି: ଆଜି ମଧ୍ୟ ପଞ୍ଚାୟତରୁ ବିଧାନସଭା ପର୍ଯ୍ୟନ୍ତ ପ୍ରତିଟି ନିର୍ବାଚନ ପରେ ‘ଉତ୍ତର-ନିର୍ବାଚନୀ ହିଂସା’ ଗଣତନ୍ତ୍ରକୁ ଲଜ୍ଜିତ କରୁଛି। ଗଣତନ୍ତ୍ରରେ ବୁଲେଟ୍ର ସ୍ଥାନ ରହିବା ଉଚିତ୍ କି? କେବେ ବନ୍ଦ ହେବ ଏହି ଭୟର ବାତାବରଣ?”
ଆମ ଅନୁସନ୍ଧାନ:
ଆମ ଅନୁସନ୍ଧାନରେ ପ୍ରଥମେ ଆମେ ଭାଇରାଲ ଭିଡିଓକୁ ବିଭିନ୍ନ ଫ୍ରେମରେ ବିଭାଜିତ କରି ପ୍ରତ୍ଯେକ ଫ୍ରେମର ଗୁଗୁଲ ରିଭର୍ସ ଇମେଜ୍ ସର୍ଚ୍ଚ କରିଲୁ। ଫଳସ୍ଵରୂପ ଆମକୁ ଭାଇରାଲ ଭିଡିଓ ଏକ ୟୁଟ୍ୟୁବ ଚ୍ୟାନାଲରେ ଅପ୍ଲୋଡ ହେଇଥିବା ମିଳିଲା। ଭିଡିଓଟି 2 ମାସ ପୂର୍ବରୁ ଅପ୍ଲୋଡ ହୋଇଥିଲା, ଯାହା ସ୍ପଷ୍ଟ କରେ ଯେ ଏହାର ସମ୍ପ୍ରତି ପଶ୍ଚିମବଙ୍ଗ ନିର୍ବାଚନ ସହିତ କୌଣସି ସମ୍ପର୍କ ନାହିଁ।
ତଦନ୍ତ ସମୟରେ ଭାଇରାଲ୍ ଭିଡିଓଟିର ଆହୁରି ଭଲ ଭାବରେ ପରୀକ୍ଷା କରିବା ପରେ, ଆମେ ଦେଖିଲୁ ଯେ ଏଥିରେ ବଙ୍ଗଳା ଭାଷାରେ ଲେଖାଥିବା ଏକ ବ୍ୟାନରରେ ପ୍ରଦର୍ଶିତ ହୋଇଛି: “ତ୍ରୟୋଦଶ ଜାତୀୟ ସଂସଦୀୟ ନିର୍ବାଚନ – ୨୦୨୬, ରସିକ ନଗର ସରକାରୀ ପ୍ରାଥମିକ ବିଦ୍ୟାଳୟ, ନିର୍ବାଚନ ଡ୍ରିଲ୍।” ଏହି ଦୃଶ୍ୟଗୁଡ଼ିକ ସୂଚାଇ ଦେଉଛି ଯେ ଭିଡିଓଟି ବାଂଲାଦେଶର ଦିଘିନାଲା ଉପଜିଲାରେ ଅବସ୍ଥିତ ରସିକ ନଗର ସରକାରୀ ପ୍ରାଥମିକ ବିଦ୍ୟାଳୟରେ ଆୟୋଜିତ ଏକ ମକ୍ ନିର୍ବାଚନ ଡ୍ରିଲ୍ ଦର୍ଶାଉଛି।
ଗୁଗୁଲ୍ ମ୍ୟାପ୍ସ ଷ୍ଟ୍ରିଟ୍ ଭ୍ୟୁ ବ୍ୟବହାର କରି ଅଧିକ ତଦନ୍ତ କରିବା ପରେ, ଆମେ ଭାଇରାଲ୍ ଭିଡିଓରେ ଦେଖାଯାଉଥିବା ଲାଲ ସ୍ତମ୍ଭ ସହିତ ସବୁଜ କୋଠା ଥିବା ଏକ ସ୍ଥାନ ଚିହ୍ନଟ କରିଥିଲୁ। ଏହା ସ୍ପଷ୍ଟ କରେ ଯେ ଭିଡିଓଟି ପଶ୍ଚିମବଙ୍ଗର ନୁହେଁ, ବରଂ ବାଂଲାଦେଶର।
ଏହା ସହିତ, ଆମେ ବାଂଲାଦେଶ ସେନା ଦ୍ୱାରା ପରିଚାଳିତ ଏହି ସମାନ ଅଭ୍ୟାସର ବିସ୍ତୃତ ବିବରଣୀ ପ୍ରଦାନ କରୁଥିବା ଅନ୍ୟ ଭିଡିଓଗୁଡ଼ିକ ପାଇଲୁ। ରିପୋର୍ଟ ଅନୁଯାୟୀ, ତ୍ରୟୋଦଶ ଜାତୀୟ ସଂସଦୀୟ ନିର୍ବାଚନ ପୂର୍ବରୁ ସୁରକ୍ଷା ସୁନିଶ୍ଚିତ କରିବା ଏବଂ ଆଇନ ଶୃଙ୍ଖଳା ବଜାୟ ରଖିବା ଲକ୍ଷ୍ୟରେ ଫେବୃଆରୀ ୯, ୨୦୨୬ ରେ ଦିଘିନାଲା ଜୋନର ରସିକ ନଗର ସରକାରୀ ପ୍ରାଥମିକ ବିଦ୍ୟାଳୟରେ ଏକ ନକଲି ନିର୍ବାଚନ ଅଭ୍ୟାସ ଅନୁଷ୍ଠିତ ହୋଇଥିଲା। ବାଂଲାଦେଶ ଫେବୃଆରୀ ୧୨, ୨୦୨୬ ରେ ଏହାର ୧୩ ତମ ଜାତୀୟ ସଂସଦୀୟ ନିର୍ବାଚନ ଆୟୋଜନ କରିଥିଲା।
ସିଦ୍ଧାନ୍ତ:
ଆମ ଅନୁସନ୍ଧାନରୁ ପ୍ରମାଣିତ ହେଲା ଯେ ଭାଇରାଲ ଦାବି ମିଥ୍ୟା ଅଟେ। ବାଂଲାଦେଶର ଏକ ମକ୍ ଡ୍ରିଲର ଭିଡିଓକୁ ପଶ୍ଚିମବଙ୍ଗରେ ସମ୍ପ୍ରତି ହୋଇଥିବା ନିର୍ବାଚନ ସମୟରେ ହିଂସାର ଫୁଟେଜ୍ ଭାବରେ ସେୟାର କରାଯାଉଛି।
Title: ପଶ୍ଚିମବଙ୍ଗ ନିର୍ବାଚନ ସମୟରେ ହିଂସା ସମ୍ପର୍କରେ ମିଥ୍ୟା ଦାବି କରାଯାଉଛି; ଭାଇରାଲ ଭିଡିଓଟି ପ୍ରକୃତରେ ବାଂଲାଦେଶରେ ଏକ ମକ୍ ଡ୍ରିଲ୍କୁ ଦର୍ଶାଉଛି।
Fact Check By: Siddharth Sahu
Result: False
